Prins Mischa

Beste Poerkers en Poerkerinne,

Miene naam is Mischa Koks. Zoon van Erika Bakker en Sander Koks. Ik woén mien ganse laeve al met vuuél plezeer same met mien elders en zuske Jessie op de Beeretweg midde in ut dörp. Eine echte Hout Blierickse jóng dus.
Ik zit op 2 HAVO van ut Blariacum College same in de klas met Adjudant Daan. Mien hobbies zien voetballe beej HBSV in de JO14 same met miene angere Adjudant Tijn. Auk daon ik gaer gamen en in de zomer visse met allebei mien adjudante. Auk halt ik van lekker aete, ut leefste de frietjes van opa of ein (of mierdere) stökke vleis.

Veurig jaor zoot ik in de Raod van Elf en heb ik de smaak te pakke gekrege wie ut is um same met mien vrinde op de bühne te staon. Ik waas dan auk hiel veriert det de Poerker mich kwaam vraoge of ik Jeugprins woel waere. Dao hoofde ik neet lang euver nao te dinke en ik zei geliek JAO. Mien Adjudante wis ik geliek en ik ving ut supertof det de Poerker Roosje as ósse Sirremoniemeister haet gekaoze.

Wat auk erg leuk is um te vertelle is det miene Paetoom Vors Poerkwazel de viefde precies op de datum aaf 3×11 jaor geleeje Jeugprins is gewaore. Dus: det zit beej ós in de femilie.

Ik kiek d’r erg naor oët um als Hoëgheid same met ut ganse gezelschap baove op de groéte Prinsewaage daor ut Poerkerriek te trekken op Vastelaoves zaoterdig.

Adjudant Tijn

Ik bin Tijn Leemans, zoon van Ken Leemans en Yvonne Leemans-Hilberts en broor van Yves. Ik bin 13 jaor alt en ik woën op de Horatiuslaan in Hout Bliërick.
Met unne Belgische pap, bin ik unne halve boetelander in ut dörp. Maar de vastelaovesjoeks van mam haet ze good op ós allemaol euvergebrach.
In ut dageliks laeve gaon ik naor ut Valuascollege in Venlo waor ik in de twiëde klas van ut VWO zit. In miene vreeje tiéd staon ik 3x per waek ónger de lat beej HBSV en gaon ik gaer visse met mien vrinde Prins Mischa en adjudant Daan. Verder gaon ik gaer op vekansie en bin ik gek op skiën. Beej slech weer bin ik auk achter miene Playstation te vinge!
Al jaore langk trek ik elke optoch in Hout Bliërick, Bliërick en Venlo mei, same met Prins Mischa en adjudant Daan. Dit doon weej met hiél vuuél plezeer op de waage beej miene oom Max en eure vrindeclub Laat Begos.
Maar deze vastelaovend laup ik veurop, same met Prins Mischa en adjudant Daan, um d’r eine toffe vastelaovend en ein fantastisch fees van te make same met óg op de Poerkerplak! Alaaf!

Adjudant Daan

ik bin Daan Bekkema, de twiede adjudant. Ik bin de aldste zoon van Erwin en Stannie Bekkema en groëte broor van Juul. Weej woén op de Moutzhofwaeg.
13 jaor geleeje bin ik gebaore op de joeksige datum 11-08-2011!
Vastelaovend 2023 waas ik de groéte prins van BS de Springbaek en det waas un super toffe ervaring.
Veurig jaor waas ik raodslid van de poerkerjeug.
Same met hoëgheid Mischa d’n iërste zit ik in de 2e klas Havo op ut Blariacum college.
Ik voetbal hiél gaer beej HBSV in de JO15-2 as verdediger.
Voetballe en gamen op de playstation  doon ik gaer met mien vrinde.
Same met Mischa, Tijn en Roosje heb ik hieél vuuél zin um dr unne onvergaetelikke vastelaovend van te make heej op de poerkerplak.

Sirremoniemeister Roosje

ik bin Roosje Brans en ik bin 14 jaor.
Ik bin gebaore en getaoge in Hout-Bliërick.
Mien pap en mam zien Marc en Lobke.
Auk heb ik ein breurke, Juus.
Mien hobby is voetballe in ut damesteam MO15 beej HBSV.
Ik ving det kei tof um te daon.
Dus dames, geej mot mich effe misse no.
Ik zit op ut Blariacum college in ut 2 e jaor.
Heej zit ik in ein sportklas wat ik auk leuk ving.
Vastelaovend is mich met de paplaepel ingegaeve.
Zoe bin ik in 2011 de jóngste inwoeënster (poerkerinneke) gewaes en kreeg ik bezeuk van d’n
Hoëgheid Sjaak IV ( Jek ) met zien adjudante. Auk heb ik wie ik 4 waeke ald waas, in de wage, al de
optoch meigelaupe. Idder jaor doon ik mei met de vrindegroep van pap en mam, VC Halfum. Twieje
jaor geleeje meuste zeej ut auk ff zónger mich doon, want toen waas ik dansmerietje beej de
poerkerjeug. Dus… Vastelaovend is veur mich ut vetste fiesje van ut jaor.
Ik ving ut dus auk super tof en sjiek det ik gevraog bin as sirremoniemeister op de Poerkerplak. Ik
gaon dao met dit kwante trio unne supervette vastelaovend van make.
Vastelaovend same