Jubileumtrio 2024
As Prinsekemmissie kwame weej rond de zomer beejein um d’n aaftrap veur os jubileumjaor te make. Un jubileumjaor is netuurlik extra speciaal en vruug van os as kemmissie un trio det duudelik sterk verbonde is met de Poerker. Snel hadde weej de naam van ozze nieje hoëgheid op de taofel ligge. Veur os en de huule Poerkerplak DE perfecte jubileumprins. Unne Prins dae al 11 jaor beej de raod van 11 zit, en daorbeej auk al 11 jaor actief is in de PR kemmissie en sinds 2018 zitting haet in ut bestuur. Maar naeve de Poerker auk beej vuul angere zaake in ut dörp verbonde is. En zeker same met zien Adjudante vanoët Racing team Puin un actieve rol in os samelaeving duit vervulle. Maar dees keus brach wal wat praktische oëtdaginge met zich mei. Net un paar maond vader en woënachtig in Spaubaek. Maar weej waare ut ins, weej gaon d’r veur!
Zoë ginne weej op unne zondigmorge oppe tiëd richting Spaubaek. Met unne kleine van un maond of dreej zulle zeej wal oppe tiëd wakker zien en haopelik nog gin kraombezeuk. Met det excuus kwaame weej auk aan de deur, weej komme as Prinsekemmissie beej dich as raodslid op kraomvisite. Netuurlik wal wat verdach maar ja, wat mosse gluive? Theo bewonderd, bekske koffie, wat slap gewazel en toen ut kedootje oëtpakke. Unne slabber van de Poerker, met de tekst Miene pap wuurt Poerkerprins 2024. Perplex waas ozze nieje Prins, gin weurt had hae d’r veur. Jao, det wil ik zeker waas wat d’r ut iërs oët kwaam. Hae keek Mae aan en d’r volligde unne goodkeurende blik, det is diene druim, doon dus!
De name van de adjudante kwaame auk snel op taofel. Onger ut genot van un fles beer hebbe we d’r dae zondigmorge op geproos. Op de terukwaeg hadde weej as kemmissie de tiëd um te bedinke wie weej de adjudante ginne vraoge. Allerlei scenario’s bedoch, maar oëteindelik de mekkelikste, gewoën achterum laupe, ut waas 30 graade, de ganse buurt had de rolloëke umliëg. Zoë woort Haike de vraog gesteld um Adjudant te waere, auk heej direct unne jao en auk Simone had d’r geliëk zin in.
Maondigmorge un aafspraok beej Tebben gemak, auk un bietje verdach misschien, maar Sjaak had maar un uurke um d’r zich de kop euver te breeke. In un spraekkamer op kantoër had hae wal door ut plafond wille springe van enthousiasme, maar det zoej de collega’s wellich opvalle. Dus met ingehalde bliejschap hebbe weej met un bekske koffie d’r op geproost. Monique zoej hae ut nao ut werk vertelle, maar det zoot wal good, waas Sjaak direct euvertuugd. En zoë hadde weej ut Jubileumtrio beejein.
Prins Maurice I
Maurice Gerritsma, Hout-Bliërickenaer in herd en niere, maar nou efkes woënachtig in ut pietoreske Kwakkerteriék (Sjpaubik). Hae is 31 lentes ald en woënt same met zien vrouw Mae. Zeej kump oët Voelender. Ein good half jaor geleeje zien zeej de trotse elders gewaore van zoon Theo!
Gebaore as zoon van Peter Gerritsma van Mien van de lange van Paol 70 en Jacqueline Gerritsma van Thei van Hanssen Tien oët kessel. Hae haet twiëje breurkes: Jeroen van 29 en Juul van 26 jaor.
Vanoët zien slaopkamerraam keek hae as jonk menke al oët naor ‘De mammes’. Hae woort dan auk regelmaotig meigesleip naor d’n euverkant en kump nog altiëd gaer in ut keffee. Hae is lid van spaarkas zônger eine cent beej keffee ’t Getske waor hae same met zien Adjudante én ganse vrindeclub al hiel wat lol haet gemak. Zien Vastelaovesblood is um met de paplaepel ingegaote. Hae meus al as klein menke pap meihelpe met ut opbouwe van de zaal beej Holtheim en waas d’r altiëd beej wie ziene pap as lid van de wieze raod van 11 op de buun stong.
As letste man haet de hoëgheid ein rieke voetbalcarrière beej HBSV gehad, met ein kampioenschap in de B3 as hoëgtepunt. Nao ein kneënblessure is hae nog ein aantal jaor met vuul plezeer leider gewaes van ut veerde elftal.
Naodet Adjudant Haike Jeugprins is gewaes, is hae met zien kammeruuj in ‘ut Brook’ ein kiët begos. Kiët Puin waas un begrip in de umgaeving. Vanoët alle windrichtinge wiste de laeftiëdsgenoote de pippowaage te vinge. Vuul vrindschappe zien heej ontstaon. Dit is auk de grondslaag gewaes van Racing Team Puin. Zeej hebbe veurig jaor heur 12,5 jeurig jubileum gevierd en zien nog altiëd actief in de Nachcross competitie. Waekeliks wuurt der unne aovend aan de waages gewerkt, waor netuurlik un fleske König pils (en ein klein kiësplenkske van adjudant Sjaak) neet ontbrik.
Maurice is in ut dageliks laeve druk met ut Vastgoedbeheer beej woëningbouwvereiniging ZOwonen in Zitterd. Hae ken dus vanoët de Sjpaubikse heuvels lekker op ut fietske naor ut werk, maar auk heej zegge ze: Kiek dao! Eine Poerker. Boete zien werk en gezin is hae dan auk altiëd in Hout-Bliërick te vinge. As veurzitter van de Pers en Propaganda kemmissie zit hae in ut bestuur van De Poerker.
En als der urges un fiësje is, dan is ozze hoëgheid gaer van de partie. Van de Zwarte Cross tot Rock Werchter, maar auk gewoën lekker met un glaas beer in ut keffee. Met ut 4×11 jubileum is hae in de speegeltent oëtgeroope as lid van de Raod van 11. En wat is d’r dan moeijer dan beej zien eige 11 jeurig jubileum Prins te zien!
Adjudant Haike
Haike van den Boogaard, 32 jaor jongk. Geboare op Steijl as zoon van Hay en Mieke van de schmink van den Boogaard. Nog neet getrouwd, maar wal verloofd met Simone Maters. (stief)Dochter van Miriam Maters en Nico van Jacobs van ut Lieuwke van de Paolwaeg. Same hebbe zeej 2 kinger; Haike Jr. van 5 en Lola van bijna 4.
Haike is werkzaam beej Heidenend, ut femiliebedriëf van ziene pap en oom Bart, as transportplanner en alles wat d’r verder beej kump kieke. Heej heat hae ut erg naor ziene zin.
Wie hae 6 jaor waas is Haike same met zien pap, mam en zuskes Nina en Zoë verhoës naor Hout Bliërick waor zeej ginge woëne op de Horstwaeg. Ongertusse woënt hae now 2 jaor met zien gezin op de Beeretwaeg, waor zeej zich neet zulle verveale.
In ziene vreeje tiëd is hae weakeliks te vinge op de Horstwaeg met de vrinde van Puin um te “sleutele” aan de crosswages waormei zeej jaorliks meidoon aan de nachcross van Boalder en Kessel. Met diezellufde vrinde geit hae gear ein pilske drinke beej keffee ‘t Getske waor hae tevens lid is van spaarkas zônger eine cent. Heej is hae auk regelmaotig te vinge um te darte als back-up beej DC ‘t Getske 4.
Haike is gear actief bezig in ut vereinigingsleave. Zoë is hae inmiddels 11 jaor lid van de optochkemmissie van de Poerker, waor hae 3 jaor veurzitter van is gewaes. Dit stokje haet hae ongertusse euvergedrage, maar hae zet zich d’r gear veur in. Al zal ut dit jaor wat minder zien.
Vastelaovend zit Haike in ut blood. In 2007 is hae Jeugprins gewaes same met zien Adjudante Sjoerd Custers en Tom Peeters. Hae vingk ut geweldig um dit now as Adjudant mei te meuge make met zien kammeruuj : d’n hoëgheid Maurice en Adjudant Sjaak en netuurlik de res van alle vrinde. Jaorelangk hebbe zeej meigedaon met d’n optoch op de Poerkerplak met de groep Beater genne Puin en veurig jaor veur ut iërs met Puin en de kinger. Det vond hae kei tof.
Adjudant Sjaak
Sjaak Tebben, haet net as de Poerker un jubileum, hae is namelik aafgelaupe Kerst 3×11 jaor jongk gewaore. Gebaore op de van Boerlostraot in Bliërick as zoon van Francois en Sandra Tebben van de kies. Sjaak haet ein breurke, Wouter van 27 jaor jongk en hae is trotse Peter van Linn van bijna 4 jaor. Sjaak is al 13 jaor same met zien vrouw Monique van Jacques en Thea Joosten oët de Klingerberg. Same hebbe zeej twiëje kinger waor zeej enorm trots op zien, Veerle van 4 en Stijn van 2. Zeej hebbe zich in 2018 good genesteld op de Noordervaart in ut Worteleschrabbersriëk.
Same met zien vader, mooder en breurke is Sjaak werkzaam in ut femiliebedriëf Tebben wat door zien opa en oma, Sjaak en Mia opgerich is in 1958. Zeej gaon as 3de generatie Tebben vol passie en trots heej verder aan bouwe.
Net als de hoëgheid Maurice en adjudant Haike haet Sjaak op bassisschoël de Springbaek gezeate en ware zeej van kinds aaf aan in ut wiekend te vinge op de voetbalvelde van HBSV. Al snel merkte zeej det ze beater in de derde helluf ware. In de kantine woorte un aantal pilskes gedronke en vervolgens woorte de middige en aovende doorgetrokke in kiët Puin die 2 straote verderop stong beej Haike thoës. De kiët is d’r neet mier maar desondanks wuurt d’r nog eavegood geborreld op de horstwaeg maar now beej Racing team Puin.
Auk Sjaak kump geer in keffee ‘t Getske waor hae al vuul jaore lid is beej spaarkas Zônger eine cent. Maar auk as ald clubkampioen nog iddere dinsdigaovend zien pielkès goejt beej DC ‘t Getske 2. Verder zet hae zich in veur de jubileumkemmissie van de Poerker en is hae sinds kort Secretaris beej de Venlose juniorkamer die zich inzette veur diverse lokale activiteite waoronger de Eierlaup wat hae aafgelaupe jaor mei haet georganiseerd.
Dit jubileumtrio kiek d’r enorm naor oët um same met heur vrinde, femilie en alle Poerkers d’r un geweldig vastelaovensjaor van te gaon make!