Prins Tom I
Prins Tom I Custers, aukwal, Tom van Jan van Jo van Netje van de coöperatie en van Ank van Tagage en aukwal Petat geneumd. Geboore en getaoge in d’n dreejhook als enigste breurke van Willemijn, iërste jeugprinses Karlijn en Marjolijn. Al afgerond 11 jaor same met Carolien en super trotse pap van Luca en Jip. Momenteel woënt hae op de PC Hoofdstraot van de Poerkerplak, vlak langs de Kopere en de Gats.
Opgegruujd op de Luuschwaeg, makte det hae al vanaaf kleins aaf aan mei leep in de optoch. Later waas dit beej de Fanfare en met vrindegroep Beater Genne Puin auk un aantal jaore beej de groëte waages. De letste jaore haet Tom met un kleine aaftakking as Net Neet, of beej Leevergekker of Straotendrek meigedaon. Hae haet d’n optoch nog noeits vanaaf de kant gezeen, zonder zelluf mei gedaon te hebbe. Hae is dan auk erg beniejd wie ut zal zien um dit vanaaf ut hoëgste punt en as aafsloëter mei te meuge make.
Zien werk beej GTE besteit oët ut in elkaar zette, in bedriëf stelle en onderhalde van verpakkingsmachines, veural veur de medische industrie. Heej meug Tom dan auk aaf en toe veur ut vleegtuug in en is hae efkes weg van hoës.
Zien hobby’s zien meziek make, momenteel vuul te weinig voetballe, aaf en toe biljarte en klusse. Meziek mak Tom beej Straotendrek en bigband Overload in Neer. Voetballe beej HBSV haet ozze Prins meuge ervaare van selectie tot de kelderklasse. Momenteel is hae steunend en kreunend lid van HBSV 5, ofwel ut zevende, veurnamelik veur de gezelligheid en de aafsloëtende quiz.
Auk ut biljarte duit hae met dezelfde instaek, onder ut motto: wie vaker de bal rond geit, wie mier kans op punte. Soms tot ergernis van de op laeftiëd ziende taegestanders, as um dit auk nog lukt.
Ut klusse is de letste jaore geëscaleerd tot un groëter project. Same met huul vuul hullup van vrinde en femilie hebbe Carolien en Tom de nostalgische scheur van Biemans en Kranebroek umgetoverd tot heur eige thoës. Sjiek um ut fiës nao de Roop Oët daor te meuge viere!
Binne de Poerker is Tom auk al ongeviër 11 jaor verantwoordelik veur, veural de praktische zake van de pr-commissie, zoas de vlagge en banners plaatse. Auk is hae de maker van de rebus en de kruutswoordpuzzel in de Poerkerkrant.
Adjudant Tom
Adjudant Tom Peeters (de meiste kinne um als Schier) is 32 jaor en geboore en getaoge in Hout-Blierick. As zoon van Sraar van Nel van Vercoulen en Diny van Wim en Stiena Groetelaers heat hae huul wat jeurkes op de Voortwaeg beej de Tangkoel gewoënt maar sindskort woënt hae in ut Venlose.
Ut vastelaovesblood zit der good in, want hae heat bijna alle optochte beej de Poerker mei gelaupe in dees 32 jaor. Ut begos vruuger beej de Luie Hook, vervolges met de fanfare en auk un aantal jaor met Kiët Klep. Doarnao met de Raod van 11 waor Tom 8 jaor lid van is gewaes en de letste jaore met Straotendrek.
Tom werkt in ut dageliks leave beej Havens Diervoeders in Maashees en is verantwoordelik veur de “MCSubstradd (champignon)” tak. Hae verkup wereldwiëd beejvoedmiddel veur champignoncompost en hellupt de minse met analyseere van deze compost.
In ziene vreeje tiëd is hae al 25 jaor lid van HBSV waor hae de letste jaore same met Prins Tom in “ut Zevende” speult. Dao neavebeej speult hae auk al mier as 15 jaor Bariton beej Straotendrek.
Ut organiseere van activiteite en reizen vindt hae auk leuk um te doon. Hae organiseert geregeld uitjes veur de vrinde, ut voetbalteam en boekt artieste beej HBSV. Maar regelt auk al 14 jaor de Roop Oët same met de zittingscommissie beej de Poerker.
As d’r dan nog un bietje tiëd euver is, hellupt hae geregeld met klusse beej vrinde en drinkt hae geer un glaeske beer.
Adjudant Sjaak
Sjaak Huijs is 35 jaor ald, gebaore op Groetwaeg nummer 7, net as de hoëgheid in de buurt d’n Dreejhook. Sjaak is unne zoon van Jan van Sjaak van staalbouw Gebr. Huys van Triena en Pe van Toën van de Voort(waeg).
Inmiddels woënt hae al jaore net euver ut viaduct in de Diderostraot. Hae woënt same met Wendy die al 17 jaor zien partner is en 2 jaor teruk zien zeej getrouwd. Same hebbe zeej 2 knappe dochters, Aukje van 7 jaor en Lynn van 4 jaor.
Sjaak is al 9 jaor werkzaam been Hutchisonports Venlo op eine reachstacker en de haavekraan wao hae met vuul plezeer de containers mei duit losse of laaje van eine trein of boét.
Knommele en klusse duit hae auk gaer, maar ut leefste met vrinde um zich haer. Al woënt Sjaak neet op de Poerkerplak, hae is d’r wal altiëd te vinde. Vruuger as slaagwerker beej de fanfare, al 13 jaor as lid van de raod van 11 en auk al jaorelang as vreejwilliger beej ut Dörpsfiës.
De vastelaovend zit um aardig in ut blood, jeugprins gewaes, optochte gelaupe met de fanfare, waages gebouwd met BaeterGennePuin en alwaer jaore met VG Kin NetNeet actief in de Poerkeroptoch. Dit alles ellike kiër weer same met de hoëgheid en dan dit jaor baove op de Prinsewaage!
Zeej gaon deeze vastelaovend op de Poerkerplak veurop onger ut motto:
De meziek van Vastelaovend wuurd door ós zelluf gemak,
Weej gaon d’r aan wies det de tent inein zak!
Zeej halde heur resepsie op zondig 16 fibberwari vanaaf 14.00 oor in ut Poerkerpaviljoen.